Мектепке электрондук каттоо системасы боюнча 7,5 миңден ашуун өтүнмө катталды

Мектепке электрондук каттоо системасы боюнча 7,5 миңден ашуун өтүнмө катталды
8-Май 2019, Шаршемби, 14:24

8-майга карата мектепке электрондук каттоо системасына 7,5 миңден ашуун өтүнмө катталды. Бул тууралуу Билим берүү жана илим министрлиги кабарлады.

Маалыматка караганда, өтүнмөлөрдүн жалпы санынан 5314 бала кабыл алынган.
Министрлик мектептерге электрондук каттоону 1-класска кабыл алууда, мыйзамсыз кирүү төлөмдөрүн алууга жана сынак жүргүзүүгө жол бербөө максатында иштеп чыккан.

Ушул жылдын 15-майына чейин кичи аймактар боюнча электрондук өтүнмөлөр кабыл алынса, 16-майдан 15-августка чейин кичи аймактардан тышкары электрондук өтүнмөлөр кабыл алынат.

“Мектепке электрондук каттоо” долбоору – бул мектеп курагына жеткен балдарды мамлекеттик жана муниципалдык жалпы билим берүүчү мекемелерине 1-класска каттоо жараянын автоматташтырууну камсыздоочу электрондук система.
Ата-энелер мектептердин тизмесин, бош орундардын санын, баланын кезектеги кыймылын жана мектепке катталуусун ар учурда компьютерден да, смартфондон да көрө алышат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!