Трамп эне-баланы бөлгөн саясаттан баш тартты

Трамп эне-баланы бөлгөн саясаттан баш тартты
21-Июнь 2018, Бейшемби, 11:57

АКШнын президенти Дональд Трамп мыйзамсыз мигранттардын балдарын ата-энесинен бөлгөн, өзүнчө жайларга жайгаштыруу саясаттынан өлкө ичиндеги, дүйнөлүк коомчулуктун каршылыктарынан улам баш тартты.

Бир лагерде ондогон балдар зымдар менен өрүлгөн капастарда кармалганын көрсөткөн фотолор, балдардын ыйлаган үндөрү коомчулуктун нааразычылыгын жараткан.

Президент өзү да шаршемби күнкү салтанатта ата-энелерден бөлүнгөн балдардын ыйлаганы аянычтуу экенин айткан. Ошондой эле жубайы Мелания жана кызы Иванка да капа болгонун кошумчалаган.

“Балдарды үй-бүлөлөрдөн бөлгөнүн көрүү жакшы эмес”,-деген Трамп чек арадан мыйзамсыз өткөндөргө байланыштуу саясат уланарын айтты.

Жаңы жарлык мигрант үй-бүлөлөргө балдары менен бир жайда кармаларына шарт түзөт. Качан күчүнө кирери белгисиз.

Буга чейин Мексикадан өлкөгө мыйзамсыз келген мигранттар кармалып, качкындар борборлоруна, федералдык абактарга жайгаштырылып жаткан. Көпчүлүгүнө мыйзамсыз иштери үчүн иш козголгон.

Эскерте кетсек, Дональд Трамп “АКШ мигранттар үчүн лагер же качкындарды камсыздоочу борбор болбойт! Карагыла, Европа жана башка аймактарда эмне болуп жатат. АКШда да ошондой болуусуна жол бербейбиз. Мен президент болуп турганда мындай болбойт”,-деген. Айтылгандар Бириккен улуттар уюмунда (БУУ) сынга алынган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!