Добуш санагандан чарчаган 272 кызматкер көз жумду

Добуш санагандан чарчаган 272 кызматкер көз жумду
29-Апр. 2019, Дүйшөмбү, 15:43

193 миллиондон ашык шайлоочусу бар Индонезияда 17-апрелде өткөн шайлоодон кийин узак убакыт миллиондогон добуштарды саноого аргасыз болгон кызматкерлердин 272си чарчагандан пайда болгон оорудан көз жумду. “BBC” кызматына маек курган Шайлоо комитетинин маалымат катчысы Ариф Прио Сусанто колго саноо көпкө созулгандыктан 1878 киши ооруканага жеткирилгенин айтты. Шайлоо комиссиясы көз жумган кызматкерлердин үй-бүлөлөрүнө компенсация төлөнөөрүн билдирди.

17-апрелде өткөн шайлоонун толук жыйынтыгы 22-майда чыгары күтүлүүдө.

800 миң жерде 7 миллион киши санап жатат

Индонезияда 11 күн мурда берилген добуштарды 7 миллион киши санап жатат. Алар түнү бою иштеткен шайлоо комиссиясы сынга кабылды.

Саламаттыкты сактоо министрлиги 23-апрелде ооруканаларга кат аркылуу кайрылган. Анда ооруп калган кызматкерлерге тиешелүү жардамдар берилиши зарыл экени жазылган.

Бир күндө үч шайлоо

17-апрелде борбордук жана аймактык парламенттик шайлоо өткөн. Бул да добуштарды саноону кыйындаткан факторлордун бири катары айтылууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!