Балатыга Аяз ата эмес оппозиция келди
Белградда орнотулган жасалма балаты шаардын бюджетине 83 миң евро оорчулук келтирди. Андан да мэрия балатыга Аяз атанын ордуна козголоңчулар келерин күткөн эмес.
Тургундардын нааразычылыгын жараткан маалымат антикоррупциялык "Пишталка" веб-сайтына жарыяланды. Анда журналисттер бул үчүн оппозиция шаар бийлигин паракорчулукка айыптап жатканын жазган.
Демократиялык партиянын башчысы Балша Божович “Бул дүйнөдөгү эң кымбат желим балаты. Белграддыктар тарыхында мындай шылдыңды көргөн эмес”,-деп жазган.
Шаар тургуну Миша Живкович “Баасы укмуштуудай кымбат. Буга ишене албай турам. Алар ушунчалык уятсыздар”,-деген.
Белграддын мэри Синиша Мали балатынын баасы боюнча эч нерсе билбегенин айттып, шаардыктарды сооротууга киришти. Ал эми оппозиция расмий териштирүү иштерин талап кылууда.