Сапар Исаковдун Кытайга канча жолу барганы маалым болду

Сапар Исаковдун Кытайга канча жолу барганы маалым болду
21-Май 2018, Дүйшөмбү, 18:13

Мурдагы өкмөт башчы Сапар Исаков акыркы алты жылда Кытайга 4 жолу гана барган. Бул тууралуу КСДП партиясынын катчылыгы билдирүү таратты.

Маалыматка ылайык, бардык документтерди карап чыккандан кийин акыркы алты жылда Исаковдун 4 жолу Кытайга барганы маалым болгон. Бардык сапарлар иш максатында жасалган.

“2012-жылы Сапар Исаков Пекинде өткөн ШКУга мүчө мамлекеттердин башчыларынын саммитине барган. Андан кийинки Шанхайга болгон сапар Азия менен 2014-жылы кызматташуу боюнча Кеңешменин алкагында жасалган.Үчүнчү жолу Исаков 2016-жылы Пекинге Улуу Ата Мекендик согуштун 70 жылдыгына арналган иш-чарага катышуу үчүн барган. Ал эми төртүнчү жолу 2017-жылы президенттин Пекинге жасалган иш сапарынын алкагында баргаy”,- деп айтылат КСДП партиясынын тараткан маалыматта.

“Мен Кытайга расмий делегация менен барганым көрүнүп турбайбы. Кытайга ЖЭБ маселеси боюнча бир да жолу барган эмесмин. Депутаттар кимдир-бирөөлөрдөн туура эмес маалымат угуп алып, эми элди адаштырууда”, - деп партия Исаковдун сөзүн келтирди.

Эскете кетсек, Жогорку Кеңеш Бишкектин Жылуулук электр борборундагы кырсыктын себебин жана аны модернизациялоого жумшалган 386 миллион доллардын чоо-жайын иликтеген депутаттык комиссиянын корутундусу талкуулап жатканда депутаттар Исаков Кытайга 46 жолу учканын айтышып, алар Исаковдун Кытай менен кандайдыр бир байланышы болушу мүмкүн деп күмөн санашкан.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!