Президент Эмгек жана социалдык өнүктүрүү министрин кызматтан бошотту

Президент Эмгек жана социалдык өнүктүрүү министрин кызматтан бошотту
11-Окт. 2018, Бейшемби, 15:15

Эмгек жана социалдык өнүктүрүү министри Таалайкул Исакунова ээлеген кызматынан берген арызынын негизинде бошотулду. Бул тууралуу бүгүн, 11-октябрда президенттик аппараттан билдиришти.

Маалыматка ылайык, тиешелүү жарлыкка президент Сооронбай Жээнбеков кол койгон.

Эскерте кетсек, буга чейин Башкы прокуратура Эмгек жана социалдык өнүктүрүү министри Таалайгүл Исакунованын чет өлкөгө жасаган сапарлары боюнча иликтөөнүн жыйынтыгын чыгарган. Ага лайык, министр Исакунова кезектеги эмгек өргүүсүндө болуп, дипломатиялык паспортту пайдаланып, премьер-министрге кабарлабай жана уруксат албай АКШга кетип, 2017-жылдын 6-9-ноябрь күндөрү "Инновациялар аркылуу туруктуу ишенимдин жетишкендиктери" аталышындагы глобалдык симпозиумда катышкан. Андан соң Исакунова Аргентинага жөнөп, 13-15-ноябрь күндөрү балдардын эмгегин эксплуатациялоого каршы күрөшүү боюнча IV Бүткүл дүйнөлүк конференцияга катышкан. Андан тышкары Исакунова Россиянын Санкт-Петербур шаарына барууга премьер-министрдин каршылыгына карабай, 2017-жылдын 16-18-ноябрь күндөрү Көз карандысыз мамлекеттер шериктештигине мүчө мамлекеттердин Эмгек, миграция жана калкты социалдык жактан коргоо боюнча кеңештин ХХХ мааракелик жыйынына катышкан.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!