Абылгазиев менен Энхтувшин кызматташтыктын келечегин талкуулашты

Абылгазиев менен Энхтувшин кызматташтыктын келечегин талкуулашты
12-Окт. 2018, Жума, 10:50

Премьер-министр Мухаммедкалый Абылгазиев жана Монголиянын Премьер-министринин орун басары Улзийсайхан Энхтувшин эки жактуу кызматташтыктын абалын жана келечегин талкуулашты. Бул тууралуу бүгүн, 12-октябрда өкмөттүн басма сөз кызматынан билдиришти.

Жолугушуунун жүрүшүндө Өкмөт башчы белгилегендей, Кыргызстан Монголия менен эки тараптуу мамилелерди ырааттуу өнүктүрүүнү ар дайым колдойт жана ал бүгүнкү жолугушуу бул багыттагы активдүү иштер үчүн түрткү болоруна ишеним билдирди.

«Биз өлкөлөрүбүздүн ортосундагы өнүгүү потенциалына ээ соода-экономикалык кызматташтыкты өркүндөтүүгө тийишпиз», – деди Абылгазиев.

Өз кезегинде Монголиянын Премьер-министринин орун басары жолугушуу жана кыргыз-монгол кызматташуу маселелерин талкуулоо мүмкүнчүлүгү үчүн ыраазычылык билдирди.

Тараптар эки өлкөнүн элдеринин маданий-тарыхый байланыштарын эске алуу менен артыкчылыктуу багыттар боюнча кызматташууларды тереңдетүүнүн маанилүүлүгүн белгилешти жана соода-экономикалык жана маданий-гуманитардык кызматташуу боюнча Өкмөттөр аралык комиссиянын кезектеги жыйынын жакын арада Бишкек шаарында өткөрүүнү макулдашышты.

Жолугушуунун жүрүшүндө өлкөлөрдүн туристтик потенциалын эсепке алуу аркылуу тоо кен казуу жана туризм тармактарында тажрыйба алмашуунун маанилүүлүгү баса көрсөтүлдү.

Айта кетсек, жолугушуу 12-октябрда Дүйшөмбү шаарында өтө турган Шанхай кызматташтык уюмуна мүчө-өлкөлөрдүн Өкмөт башчылар кеңешинин кезектеги жыйынынын алдында өттү.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!