Жээнбеков: "Жакында Бизнес-омбудсмен институту иштей баштайт"

Жээнбеков:
2-Ноя. 2018, Жума, 16:26

Бүгүн, 2-ноябрда президент Сооронбай Жээнбеков Ош облусуна жасаган эки күндүк иш сапарынын алкагында Араван цемент заводунун ачылышында «Биздин максатыбыз — инвесторлорду, менчикти соттордун экономикалык маселелер боюнча мыйзамсыз чечимдердин кабыл алынышынан коргоо. Жакын арада мамлекеттик органдарда ишкерлердин укуктарын коргоо максатында Бизнес-омбудсмен институту иштей баштайт. Өлкөнүн ири финансы институттарынын каражаттары региондордогу долбоорлорго түрткү берүүгө багытталган"- деп белгиледи. Бул тууралуу президенттик аппараттан кабарлашты.

Ал белгилегендей, мамлекеттик саясат өлкөнүн региондорундагы жашоо шартты жакшыртууга жана экономиканын реалдуу секторундагы долбоорлорго түрткү берүүгө багытталат. Мамлекет башчысы бул заводдун таржымалы ага жакшы тааныш экенин, 2015-жылы ал Өкмөттүн Ош облусундагы ыйгарым укуктуу өкүлү болуп турганда, ага ЖК депутаты Азамат Арапбаев кайрылып, заводдун курулушу жөнүндө айтып берип, көмөктөшүүнү өтүнгөн. Өлкөнүн Премьер-министри болуп турганда заводдун курулушу Сооронбай Жээнбековдун жеке контролунда болгон.

«Заводдун курулушунун жүрүшүндө 1000ге чукул жергиликтүү тургундар жумуш менен камсыз болуп, заводдо иштин башталышы менен 450дөн ашуун жумушчу орун түзүлөт», -деп белгиледи Жээнбеков.

Ал бул долбоорду ишке ашырууга тийиштүүлөрдү — демилгечилерди, компанияларды, чет өлкөлүк өнөктөштөрдү элдин турмушун жакшыртууга, Кыргызстандын экономикасын көтөрүүгө салым кошкону үчүн бул маанилүү күн менен куттуктады.

«Заводдун курулушуна жалпысынан 86 млн. АКШ доллары жумшалды. Заводдун курулушуна жана ишке берилишине беш өлкөнүн — Кытайдын, Россиянын, Түркиянын, Голландиянын жана Кыргызстандын банктары жана ишкерлери катышты», — деп белгиледи Жээнбеков.

Долбоорду ишке ашырууга Россия-Кыргызстан Өнүктүрүү Фонду, Синома корпорациясынын Тяньжинь цемент иниституту, Нанжин Лонг-В энержи консервейшн инжиринг компаниясы, Демир Кыргыз Интернешнл банкы, Демир Халк Банк Голландия компаниялары жана банктары колдоо көрсөтүштү. Курулушка «Араван цемент заводу» жоопкерчилиги чектелген коому 48 млн. долларга жакын өздүк каражатын салды.

Бизнести колдоо боюнча мамлекеттик демилгелерге токтолуп келип, Мамлекет башчысы акыркы мезгилде ишкерлерге коюлган тоскоолдуктарды четтетүү үчүн бир топ иш жасалганын белгиледи.

Бүгүнкү күндө бизнести жүргүзүү үчүн жагымдуу шарттар түзүлгөн. Бизнести каттоо жөнөкөйлөштүрүлүп, каттоо үчүн 3 күндөн ашык убакыт кетпейт. Региондогу эң либералдуу салык режими- төмөн салык ставкалары менен түзүлдү. Жаңы түзүлгөн ишканалар 3 жылга текшерүүдөн бошотулду.
Жээнбеков жаңы ишканалардын бирөө дагы айлана чөйрөгө, экологияга зыян тийгизбеши керектигин баса белгиледи. Таза экология — өлкөнүн улуттук байлыгы. Адистер Араван цемент заводун экологиялык эң таза ишкана деп белгилеп жатышат. Анткени өндүрүштө 16 аба тазалагыч фильтр, 2 кубаттуу чоң фильтрлер орнотулуп, айлана чөйрөгө зыяндуу заттардын чыгышына жол бербейт.

Айта кетсек, Араван цемент заводу жылына 1 миллион тонна цемент өндүрөт. Мамлекеттик казнага жана жергиликтүү бюджетке 400 миллион сомдон ашык салык жана социалдык төлөмдөр түшөт. Завод толук кандуу иштей баштаса, Кыргызстандын түштүгүн цемент менен камсыздоо маселеси чечилет. Завод заманбап технологиялар менен жабдылып, толук автоматташтырылып, бүткүл технологиялык процесстер Борбордук түйүндөн башкарылат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР