Абылгазиев согуштун ардагери Любовь Костылевадан кабар алды

Абылгазиев согуштун ардагери Любовь Костылевадан кабар алды
8-Май 2019, Шаршемби, 17:33

Премьер-министр Мухаммедкалый Абылгазиев 1941-1945-жылдардагы Улуу Ата Мекендик согуштун ардагери Любовь Костылевадан кабар алды. Бул тууралуу бүгүн, 8-майда өкмөттүн басма сөз кызматынан билдиришти.

Маалыматка ылайык, өкмөт башчы согуштун ардагерин 9-май – Жеңиш күнү менен куттуктап, ага бекем ден соолук каалады.

«Силер биздин мамлекеттин өзөгүсүңөр. Сиздердин эрдик кайраттын жана ар-намыстын айкын үлгүсү катары кызмат өтөйт. Согуш жылдары сиздер көз көрбөгөн сыноолордон өтүп, кыйынчылыктарга карабастан жеңишке жетиштиңиздер. Эң оор мезгилде эрдик жасап, өлкөнү коргоп калдыңыздар. Андан соң согуштан кийинки жылдары Ата Мекендин бакубат жашоосу үчүн тынымсыз иштеп, республикабыздын бүгүнкү негизин түздүңүздөр», – деди Абылгазиев.

Премьер-министр Өкмөт мындан ары карай дагы согуштун ардагерлерине жана тылдын эмгекчилерине колдоо көрсөтөт деп ишендирди.

«Эч ким көңүл буруусуз калбайт. Сиз сыяктуу адамдардын мисалында өсүп келе жаткан муунду тарбиялоо зарыл. Сиз аркылуу бардык согуш ардагерлерине жана тылдын эмгекчилерине чың ден соолук, руханий кайраттуулук жана узак өмүр каалайм. Мындан тышкары эртең улуу майрамды белгилей турган бардык мекендештерибизге – ачык асман жана бакубатчылык тилеп кетем!», – деди Абылгазиев.

Улуу Ата Мекендик согуштун ардагери Любовь Костылева Премьер-министр менен согуш жана андан кийинки жылдар тууралуу эскерүүлөрү менен бөлүшүп, көңүл бургандыгы үчүн ыраазычылык айтты.

Өкмөт башчы ардагер Любовь Костылевага материалдык жардам жана белектерди тапшырды.

Айта кетсек, быйыл Любовь Костылева 100 жашка чыгат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!