Жээнбеков Батукаев бошоткон ​судьяны кызматынан убактылуу четтетти​

Жээнбеков Батукаев бошоткон ​судьяны кызматынан убактылуу четтетти​
9-Июль 2019, Шейшемби, 11:33

Президент Сооронбай Жээнбеков кол койгон Жарлыкка ылайык, кримтөбөл Азиз Батукаев мөөнөтүнөн мурда абактан бошотуу жөнүндө чечим чыгарган судья Жапар Эрматов кызматынан убактылуу четтетилди.

Президенттик аппараттан кабарлашкандай, мамлекет башчысынын жарлыгына ылайык, Конституциянын 95-беренесинин 4-бөлүгүнө, «Судьяларынын статусу жөнүндө» Конституциялык Мыйзамдын 25-беренесинин 1, 2-бөлүктөрүнө ылайык жана Судьялар кеңешине караштуу Тартип комиссиясынын сунушу боюнча Судьялар кеңешине караштуу Тартип комиссиясы Башкы прокуроруна жазык жоопкерчилигине тартуу жөнүндө макулдук бергендигине байланыштуу Нарын облусунун Райондор аралык сотунун судьясынын ыйгарым укуктарын жүргүзүп жаткан Жапар Эрматов жергиликтүү соттун судьясынын кызмат ордунан убактылуу четтетилди.

Жарлык кол коюлган күндөн тартып күчүнө кирет.

Эскерте кетсек, 24-июнда Нарын шаардык сотунун мурдагы судьясы Жапар Эрматов УКМКнын тергөө абагына камакка алынган.

Ага чейин Башкы прокуратура ага карата сотко чейинки өндүрүш иштери башталганын кабарлаган. Анткени, Эрматов Нарын шаардык сотунун судьясы болуп иштеп жатканда, кримтөбөл Азиз Батукаевди мөөнөтүнөн мурда абактан бошотуу тууралуу ишти караган.

Бирок аны бошотуу тууралуу сунуш №24 тергөө абагынын башчысынын орун басарынын милдетин аткаруучусу тарабынан берилген. Мыйзам боюнча сунушту мекеменин жетекчиси гана бере алат. Жазык-процесстик жана Жазык аткаруу кодексинин талаптарына ылайык, бул ишти судья өз өндүрүшүндө албашы керек.

Иштин материадарын дыкат карабай, аны абактан бошотуу чечими Азиз Батукаевдин өлкөдөн чыгып кетүүсүнө шарт түзгөн. Батукаевди Аламүдүн райондук соту 16 жыл 8 айга эркинен ажыраткан эле.

Судья Эрматовго Жазык кодексинин "Билип туруп акыйкат эмес өкүм чыгаруу" жана "Коррупция" беренеси боюнча айып тагылды. Сотко чейинки тергөө иштерин жүргүзүү ИИМге тапшырылды.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!