Азык-түлүк коопсуздугу жана тамактануу программасы бекитилди

Азык-түлүк коопсуздугу жана тамактануу программасы бекитилди
9-Июль 2019, Шейшемби, 17:48

2019-2023-жылдарга Кыргызстанда азык-түлүк коопсуздугу жана тамактануу программасы бекитилди. Бул тууралуу бүгүн, 9-июлда өкмөттүн басма сөз кызматынан кабарлашты.

Маалыматка ылайык, тийиштүү чечимге премьер-министр Мухаммедкалый Абылгазиев кол койгон.

2019-2023-жылдарга Кыргызстанда азык-түлүк коопсуздугу жана тамактануу программасы туруктуу өнүктүрүүнүн стратегиялык артыкчылыктарын ишке ашыруу, өлкөнүн азык-түлүк коопсуздугун камсыздоо жана республиканын азык-түлүк рыногунун ички жана тышкы коркунучтарына ыкчам аракеттерди көрүү максатында кабыл алынган.

Ушул Программада саламаттык сактоо, билим берүү, экономикалык жана социалдык сектордун тармактарын өнүктүрүү программаларына интеграцияланууга тийиш болгон талаптар жана чектөөлөр аныкталган.

Азык-түлүк коопсуздугу өлкөнүн улуттук коопсуздугун камсыздоонун башкы багыттарынын бири жана анын мамлекеттүүлүгүн жана азык-түлүк көз карандысыздыгын сактоонун фактору болуп саналат.

Белгилей кетсек, буга чейин азык-түлүк коопсуздугу жана тамактануу маселелери өкмөттүн 2015-жылдын 4-сентябрындагы № 618 токтому менен бекитилген 2015-2017-жылдарга Кыргызстанда тамак-аш жана азык-түлүк коопсуздугунун программасында жана аны ишке ашыруу боюнча Иш-чаралар планында чагылдырылган жана алардын алкагында ишке ашырылган.

Азык-түлүк коопсуздугу жана тамак-аш маселелеринин жогорку артыкчылыгын эске алуу менен Кыргызстанда Азык-түлүк коопсуздугу жана тамактануу кеңеши тарабынан 2019-2023-жылдарга азык-түлүк коопсуздугу жана тамактануу программасын иштеп чыгуу чечими кабыл алынган.

Ушул Программада президенттин 2018-жылдын 31-октябрындагы № 221 Жарлыгы менен бекитилген 2018-2040-жылдарга Кыргызстандын өнүктүрүүнүн улуттук стратегиясынын максаттары эске алынды жана азык-түлүк коопсуздугун жана сапаттуу тамак-аш азыктарын камсыздоо боюнча жоболорду аткарууга багытталды.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!