Токмоктогу тойдо ууланууга сальмонеллез инфекциясы себеп болгон

Токмоктогу тойдо ууланууга сальмонеллез инфекциясы себеп болгон
10-Июль 2019, Шаршемби, 10:51

Токмок шаарында өткөн тойдо 100дөн ашык кишинин ууланышына сальмонеллез инфекциясы себеп болгон. Бул тууралуу Саламаттыкты сактоо министрлигинен кабарлашты.

Маалыматка ылайык, 29-июнь күнү дарыгерлерге тамакка ууланган 174 киши кайрылган. Алардын ичинен 78и ооруканага жаткырылган. Учурда 10 киши дарыланууда.

Аталган министрликке караштуу Оорулардын алдын алуу жана санитардык-эпидемиологиялык көзөмөл департаменти Токмоктогу тамак-аштан жапырт уулануунун себептерин аныктоо үчүн тамак-аштын калдыктары, идиш-аяктар лабораториялык изилдөөгө алынган. Лабораториялык анализдердин жыйынтыгы менен ууланууга сальмонеллез инфекциясы себеп болгону аныкталган.

Учурда уулануу катталган «Мегаполис» кафеси Токмок санэпидемстанциясы тарабынан кемчиликтерди жойгонго чейин убактылуу жабылды.

Эскерте кетсек, Токмок шаарында «Мегаполис» кафесинде 29 июнь күнү 256 адам катышкан үйлөнүү үлпөт тою болуп өткөн. Тойго Токмок, Бишкек, Кочкор жана Ысык-Көлдөн 256 киши чакырылган. Ал эми уулануудан жабыркагандар ар кайсы областын ооруканаларына кайрылышкан.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!