Сооронбай Жээнбеков менен Ули Маурердин расмий жолугушуу аземи болду

Сооронбай Жээнбеков менен Ули Маурердин расмий жолугушуу аземи болду
10-Июль 2019, Шаршемби, 16:57

Бүгүн, 10-июлда президент Сооронбай Жээнбеков Берн шаарындагы «Лон Манор» резиденциясында Швейцариянын президенти Ули Маурер менен жолугушту.

Президенттик аппараттан кабарлашкандай, резиденцияда Кыргызстандын жана Швейцариянын мамлекеттик желектери көтөрүлүп, Ардактуу кароол тизилген.

Эки өлкөнүн мамлекеттик гимндери жаңырып, Сооронбай Жээнбеков жана Ули Маурер Ардактуу кароолду кыдырышты жана расмий делегация мүчөлөрүн тааныштырышты.

Андан соң мамлекеттер башчылары тар курамда сүйлөшүүлөргө бет алышты, андан соң жолугушуу кеңейтилген курамда уланат.

Белгилей кетсек, кечээ, 9-июлда президент Сооронбай Жээнбеков Швейцариянын президенти Ули Маурердин чакыруусунда расмий визит менен Швейцария Конфедерациясына учуп кеткен.

Визиттин алкагында Жээнбеков Федералдык жыйынынын Улуттук кеңешинин төрагасы Марина Кароббио Гушетти жана Улуттук банкынын төрагасы Томас Йордан менен жолугушат.

Мамлекет башчысы ошондой эле Швейцариянын ири бизнес өкүлдөрү менен жолугат, ага Кыргызстандан барган ишкерлер катышат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!