ТИМ: Сооронбай Жээнбеков менен Эмомали Рахмон жолугушат

ТИМ: Сооронбай Жээнбеков менен Эмомали Рахмон жолугушат
23-Июль 2019, Шейшемби, 17:55

Президент Сооронбай Жээнбеков менен Тажикстандын президенти Эмомали Рахмондун жолугушуусун өткөрүү боюнча иштер жүрүүдө. Бул тууралуу бүгүн, 23-июлда Тышкы иштер министрлигинен билдиришти.

Маалыматка ылайык, жетишилген макулдашууларга ылайык тараптар эки өлкөнүн мамлекет башчыларын жолугушуусун уюштуруу боюнча иш жүргүзүүдө.

"Жолугушууда күн тартибинде турган эки тараптуу бир катар маселелер, анын ичинде кыргыз-тажик мамлекеттик чек арасын делимитация жана демаркация маселелери талкууланат" - деп айтылат маалыматта.

Белгилей кетсек, кечээ, 22-июлда саат 17:20 чамасында Тажикстандын Ворух айылынын жашоочулары айылдын кире беришине флагшток орнотушкан. Ага Баткендин Ак-Сай айылынын жашоочулары нааразычылык билдиришип, чырлаша кетишкен. Анын натыйжасында жарандардын бири курал колдонуп, ок чыгарган.

Буга чейин өкмөттүн облустагы өкүлчүлүгү чек арадагы жаңжалдан улам 15 кыргызстандык жабыркап, ооруканага түшкөнүн кабарлаган. Алардын 12сине ок жаңылса, калганына таш тийген.

Ал эми Тажикстандын бир жараны каза таап, бир нечеси жабыркаганы айтылууда.

Бүгүн, 23-июлда чек арадагы жаңжалга байланыштуу тажик тарап Лейлек районуна кете турган Исфана-Баткен унаа жолун жапкан.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!