Жумабеков: Мамлекеттик тилде сүйлөө – биз күткөн деңгээлде болбой жатат

Жумабеков: Мамлекеттик тилде сүйлөө – биз күткөн деңгээлде болбой жатат
10-Сен. 2019, Шейшемби, 11:17

Бүгүн Жогорку Кеңеште 23-сентябрь – Мамлекеттик тил күнүнө карата “Мамлекеттүүлүк жана мамлекеттик тил” аталышындагы илимий-тажрыйбалык конференция өтүп жатат.

Анда сөз сүйлөгөн төрага Дастан Жумабеков Мамлекеттик тил жөнүндө арналган илимий-конференция Жогорку Кеңеште өтүп жаткандыгынын символикалуу жагы бар экендигин белгиледи.

“Анткени, ал чыныгы демократиялык түзүлүштүн, жаңы кубулуштун ачык айкындуулуктун желаргысы баштаган өткөөл кезинде кыргыз парламенти тарабынан кабыл алынган эң алгачкы тарыхый документтердин бири болуп саналат”, – деди ал.

Төрага Дастан Жумабеков мамлекеттик тилди колдонуу абалына да токтотуп өттү:

“Элди түбөлүк эл кылып турган – анын тили”, – деп улуу калемгерибиз Чыңгыз Айтматов айткандай, тил – бир адамдын жашоодогу негизги мүмкүнчүлүгү гана эмес, бир улуттун башкы байлыгы. Бирок азыркы учурда мамлекеттик тилде сүйлөө, жазуу, колдонуу абалы биз күткөн деңгээлде болбой жатат. Муну моюнга алышыбыз керек”.

Кыргызстанда жашаган бардык этностордун өз эне тили менен элдик маданиятын өнүктүрүүгө эч тоскоолдук жок экендигин айткан спикер Дастан Жумабеков бүгүнкү иш-чаранын бардык катышуучуларын тил майрамы менен куттуктап, сөзүн жыйынтыктады.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!