Кадырбеков: “Кыздар арасында боз үй тигүү боюнча мелдеш өткөрүлөт"

Кадырбеков: “Кыздар арасында боз үй тигүү боюнча мелдеш өткөрүлөт
10-Сен. 2019, Шейшемби, 16:04

Жыл сайын өткөрүлүүчү Улуттук көчмөндөр оюну быйыл алгачкы ирээт Талас жергесинде 15-сентябрда өткөрүлөт. Бул тууралуу Маданият, маалымат жана туризм министринин орун басары Нуржигит Кадырбеков маалымат жыйында билдирди.

Ал маалымдагандай, быйылкы көчмөндөр оюнунда ар бир облустан келген коноктор өзүнүн аймагынын өзгөчөлүгүн тартуулашат:

“Баткен облусу Айгүл гүлү тууралуу, Нарын Таш-Рабат, Ош Сулайман-Тоо сыяктуу өздөрүн тартуулашат. Аны менен бирге, тамак-аш, кийим, боз үй кооздугу боюнча конкурстар уюштурулат. Эркектер жана кыздар арасында боз үй тигүү боюнча мелдеш өткөрүлөт".

Ал эми Жаштар иши, дене тарбия жана спорт агенттигинини директорунун орун басары Канатбек Арпачиев иш-чарада улуттук оюндун 10 түрү көргөзүлүп, спортко тиешелүү баш-аягы 705 киши катыша тургандыгын билдирди.

Эскерте кетсек, Көчмөндөрдүн республикалык оюндары быйыл Талас дубанында болоору белгиленген.

Оюндардын алкагында Талас шаарынын ипподромунда спорттук мелдештер жана «Манас-Ордо» Кыргыз улуттук комплексинде маданий иш-чаралар өткөрүлүп, этнобазар уюштурулат.

Сүрөт. Кабар

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!