Бүгүн, 5-декабрда Жогорку Кеңештин депутаты Максат Сабиров «Азаттык» радиосу берген журналисттик иликтөөгө токтолуп, анда ант берген офицерлердин айткандарына көӊүл бурду. Бул тууралуу Жогорку Кеңештин басма сөз кызматынан кабарлашты.
«Анда ант берген чек ара кызматкерлери – майор Камчыбеков менен улук лейтенант Осмонбеков «Манас» аэропортундагы көзөмөл-өткөрүү бекетинен акчалар кантип ташылып турганын айтышкандыгы үчүн кылмыш иши ачылып качып жүрүшкөндүгүн айтып жатышат»,- деген депутат биз кандай шартта жашап жатабыз деген суроо тууларын баса белгиледи.
«Бул жөн маселе эмес, бул мамлекеттик коопсуздук. Баарын акыйкат териштирип чыгуу керек. Алардын айткандарына реакция кылуу зарыл. Карап чыгып, палатада талкууланууга тийиш»,- деди Сабиров.
Белгилей кетсек, 22-ноябрда «Азаттык» радиосу“Бажыдагы миллиондор: калкалоо жана карактоо" аттуу иликтөөсүн жарыялаган. Анда бажыдагы товар өткөрүүнүн көмүскө схемалары, миллиондогон акчаларды адалдоо тууралуу сөз болот. Бул иликтөөдө аты аталып, Түркияда киши колдуу болуп каза болгон Айэркен Сайматинин өлүмү боюнча Башкы прокуратура "Киши өлтүрүүгө аракет жасоо" беренеси менен Кылмыштардын жана жоруктардын бирдиктүү реестрине каттаган. Учурда мекемелер аралык тергөө тобу иштеп жатат.
Премьер-министр Мухаммдекалый Абылгазиев иликтөө боюнча пикирин билдирип, анда айтылган акчалардын чыгарылып кетиши боюнча президенттин катышуусунда жыйын өткөнүн айткан.
Ошондой эле 2-декабрда "Азаттыктын" журанлисттери, алардын арасында иликтөөнүн автору Али Токтакунов УКМКга суракка чакырлыган.
Иликтөө иштерин ар тараптуу жана ачык айкын өткөрүү максатында Жогорку Кеңештин депутаттары Алтынбек Сулайманов, Дүйшөнкул Торокулов, экс-депутат Ширин Айтматова, жарандык активисттер, президенттин инаугурациясын өткөрүү боюнча жумушчу топтун мүчөлөрү Фарид Ниязов, Мухаммедкалый Абылгазиев, Турдуназир Бекбоев жана башкалар чакырылары беогилүү болгон.
«Азаттык Медиа» мекемеси коомчулукта резонанс жараткан соңку журналисттик иликтөөлөрүнө байланыштуу укук коргоо органдары менен кызматташууга даяр экенин, ушундан улам күбө катары суракка чакырылган журналисттер чет өлкөдө болгондугуна карабастан скайп аркылуу тийиштүү суроолорго жооп берүүгө даяр экендигин билдирген.