Алгачкы кыргызча-англисче сөздүктүн автору кайтыш болду

Алгачкы кыргызча-англисче сөздүктүн автору кайтыш болду
13-Окт. 2017, Жума, 12:11

Кыргызстанда алгачкы жолу 40 миң сөздөн турган кыргызча-англисче заманбап сөздүктү түзгөн, 50дөн ашуун мультфильм, кинолорду кыргызчалаган Жыргалбек Ажиматов узакка созулган боор оорусунан улам каза болду.

Буга чейин анын операциясы үчүн 35 миң доллар керектеле турганы айтылып, маркумдун каражаты жетпегендиктен операция жасаткан эмес.

Автор буга чейин “Кыргызча-англисче фразеологизмдер сөздүгү” жана “Кыргызча-англисче идиомалар сөздүгү” окуу куралдарын чыгарган. Мындан сырткары, Фейсбук социалдык тармагында “Кыргызча афоризмдер” деген баракча ачып, улуу даанышман ойчулдардын накыл кептерин, турмушта сабак болчу окуя-көрүнүштөрдүн мисалдарын кыргызчалап кыска-нуска, жатык тилде жарыялап келген. Көпчүлүккө белгилүү “Маша жана аюу” мультфильмин биринчилерден болуп кыргыз тилине үн коштоосу менен которгон.

Автор кыргызча-англисче сөздүктү 20 жылга жакын убакыт ичинде жазып чыккан. Жыргалбек Ажиматов 38 жашта болчу. Артында беш баласы калды. Маркумду сөөгү бүгүн өзү туулуп өскөн Кара-Суу районунун Маданият айылына коюлат.

“ZAMAN.KG” маалымат агенттиги Жыргалбек Ажматовдун жакындарына көңүл айтып, аза кайгысын тең бөлүшөт.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!