Исаков Абу-Даби фондунун башчысы менен жолукту
Кечээ, 11-февралда премьер-министр Сапар Исаков өкмөттөрдүн дүйнөлүк алтынчы саммитинин ишине катышуу алкагында Абу-Даби өнүктүрүү фондунун башкы директору Мухаммад Саиф Аль-Сувейди менен жолукту. Бул тууралуу өкмөттүн аппаратынан билдиришти.
Жолугушууну ачып жатып, Сапар Исаков Кыргызстан Абу Даби өнүктүрүү фонду менен учурдагы кызматташтыкты арттырууну сунуштады.
«Бугүн Фонддун кароосунда «Балыкчы – Каракол – Балыкчы автожолун реконструкциялоо» долбоорунун 104-220 км аралыктагы тилкеси турат. Суроонун орчундуулугун эске алып, биз долбоорду деталдуу талкулоого даярбыз», – деди Өкмөт башчы.
Ал эми Мухаммад Саиф Аль-Сувейди Бириккен Араб Эмираттары жана Кыргызстандын ортосунда достук жана конструктивдүү мамилелер калыптанганын белгиледи.
«Аны эске алуу менен Абу-Даби өнүктүрүү фонду «Балыкчы – Каракол – Балыкчы автожолун реконструкциялоо» долбоору боюнча Кыргызстандын билдирмеси менен артыкчылыктуу иретте таанышып чыгат», – маалымдады ал.
Аны менен катар жолугушуунун жүрүшүндө энергетика, транспорт, саламаттык сактоо тармактарындагы кызматташуунун мүмкүнчүктөрү тууралуу талкуулашты. Тактап айтканда Абу-Даби өнүктүрүү фондунун Бишкектин 4 шаардык ооруканасын реконструкциялоого жардам көрсөтүүсү тууралуу сөз болгон.