​ЖЭБдеги авария үчүн тургундарга 1,1 млн сом төлөндү

​ЖЭБдеги авария үчүн тургундарга 1,1 млн сом төлөндү
21-Июнь 2018, Бейшемби, 14:44

“Электр станциялар” ишканасы Бишкек жылуулук электр борборундагы аварияга байланыштуу тургундарга 1 млн. 124 миң сом төлөп берет. Бул тууралуу Жогорку Кеңештин депутаты Дастан Бекешев өзүнүн расмий сайтына жарыялады.

Маалыматка караганда, “Бишкек жылуулук түйүнү” ишканасына кайрылып, Бишкек ЖЭБиндеги авариядан тургундар канча чыгымга учураганын тактоону өтүнгөн.

Эл өкүлүнүн расмий катына “Бишкек жылуулук түйүнү” ишканасы жооп берген. ЖЭБдеги авариянын айынан 575 батирде, 92 имаратта суу түтүктөрү зыянга учураган. Жалпысынан бул багытта 59 арыз келип түшсө, алардын 55ине жалпы суммасы 1 млн. 124 миң сом төлөнүп берилди. Калганы каралып жатат.

Эскерте кетсек, 26-январдын кечинде Бишкек ЖЭБинде суу бөлүштүрүүчү жабдуу иштен чыгып, шаардыктар катуу ызгаарда бир жума бою жылуулуксуз калган. Үйлөрдө температура 11-16 градустун тегерегинде болуп, баш калаанын тургундарын катуу нааразы кылган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!