Москва соту жөө жүргүнчүлөрдү сүзүп кеткен Чыңгызга өкүм чыгарды

Москва соту жөө жүргүнчүлөрдү сүзүп кеткен Чыңгызга өкүм чыгарды
12-Окт. 2018, Жума, 09:59

Тверск соту Москва шаарынын Илинька көчөсүнөн жөө басып бараткан адамдарды сүзүп кеткен Анарбек уулу Чынгызга өкүм чыгарды. Бул тууралуу орусиялык ЖМКлар жазып чыгышты.

Соттун чечимине ылайык, Анарбек уулу Чынгыз уулу 1 жыл 6 айга коомдук жумушка тартылып, айлык акысынын 15 пайызы кармалып калат. Мындан сырткары үч жылга чейин автотранспорт айдоого тыюу салды.

Эскерте кетсек, Жалал-Абад облусуна караштуу Аксы районунун Кош-Дөбө айылынын тургуну, 28 жаштагы Анарбек уулу Чынгыз жөө жүргүнчүлөрдү сүзүп кеткен. Жабыр тарткандардын арасында эки мексикалык футбол куйөрманы жана жергиликтүү төрт адам ооруканага жаткырылган.

Чынгыз Анарбек уулу көрсөтмө берип жатып, кырсык болгонго чейин 20 сааттай уктабагандыгын жана окуя кандайча болуп кеткендигин аңдабай калгандыгын айткан: "Эмне болгонун өзүм билбей калдым. Мен унааны токтоюн деп газды басып алыптырмын. Ал жерде көп кишилер болгон, коркконуман качууга аракет кылдым. Кардарымды жеткизип коюп үйгө барып уктайын дегем. Ушундай окуя болуп калды".

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!