​Данияр: “Аялзаты бири-бирине окшошпоого аракет кылышат”

​Данияр: “Аялзаты бири-бирине окшошпоого аракет кылышат”
2-Ноя. 2018, Жума, 14:15

Бүгүнкү күнгө чейин өз ордун жоготпой келе жаткан илгерки кесиптердин бири бул зергерчилик. 7 жылдан бери көз майын коротуп, зергерчиликти кесип кылып келе жаткан Нарындын кулуну Данияр Анарбек уулу бизде конокто болуп өз кесиби тууралуу кеп учугун улады.


- Зергерчилик менен кандайча алектенип калдың?

- Мектепти бүтүп шаарга келип байкемдин үйүнө жатып иштеп калдым. Анан ошол байкемдин сунушу менен Сүймөнкул Чокморов атындагы сүрөтчүлүк окуу жайында дизайнерлик бөлүмүндө окуп бүттүм. Ошондон бери жети жыл болду зергерчилик менен алектенип келе жатам.

- Мыкты зергер болуу үчүн кандай сапаттарга ээ болуш керек?

- Жакшы зер буюм жасоо үчүн талыкпоо керек, жасаган буюмуң башкалардыкынан айырмаланып туруу үчүн ардайым идея издеп элдикинен башкача берүүгө аркет кылыш керек. Анандагы ошол жаралган идеяны металдын бетине оюңдагыдай түшүрө алатурганга колуң жөндөмдүү болуш керек. Жөндөмүң-шыгың болбосо зергер болбой эле койгон оң.

- Идея деп калдың, идеяны кайдан аласың?

- Жасап жаткан зер буюдардын оймо чиймелерин дизайнын дайыма өзүм ойлоп табам. Жасаган буюмум башкалардыкынан айырмаланып турушун жактырам. Бир идеяны башкалардан көрүп жагып калсада аны ошол бойдон көчүрүп албайм, ага башкача жаңылык киргизүүгө аракет кылам.

- Учурда кандай сөйкө шакектерге талап болуп жатат?

- Мен көбүнчө жеке буйрутма менен иштейм. Өзгөчө аял заты бирибирине окшошпоого аркет кылышат. Алар тагынган зер буюмдар айланасындагылардан айырмаланып турушун жактырышат. Мага мындай-тигиндей жасап бер деп идеяларын сунушташат ошого жараша жасап берем, же болбосо өзүмдүн жаңы моделдеримди сунуштайм.

- Бир зер буюмду жасоо үчүн канча убакыт керектелет?

- Ошол жасалып жаткан зер буюмдун татаалдыгына жараша ар кандай убакыт сарпталат. Мисалы жөнөкөй сөйкөнү 2 саат убакытта жазаса болот. А эгер татаал буюм болсо 3-4 күнгө чейин созулушу мүмкүн.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР