Ассоль Молдокматова: “Өмүрүмө коркунуч туулуп жатат”

Ассоль Молдокматова: “Өмүрүмө коркунуч туулуп жатат”
6-Дек. 2018, Бейшемби, 12:47

Коомдук ишмер, белгилүү журналист, теле-алып баруучу Ассоль Молдокматова кечээ күнү өзүнүн өмүрүнө коркунуч туулуп жатканы тууралуу пресс-жыйын өткөрдү.

Ассоль айымдын айтымында бир жылдан бери анын жашоосуна коркунуч алып келгендер көбөйгөн.Анын себебин өзүнүн чыгармачыл ишмердүүлүгүнө байланыштырат.

“Бир жылдан бери бул коркутуулар тууралуу коомчулукка айткан эмесмин.Бирок акыры андай ээнбаштардын ким экенин айтууга туура келди”, - дейт Ассоль Молдокматова.

“Мен ачуу чындыктарды айтам, бул кимдир-бирөөргө жолтоо болсо керек. Албетте, анын баарын түшүнүп турабыз. Мени бул кырсыкка кабылсын деген сыяктуу ар кандай жагымсыз нерселерди жасап жатышат. Жашоомо коркунуч туудурган адамдар тууралуу КР ИИМ атайын иш ачышты, андан тышкары менин дасыккан жактоочум бар” дейт.

Акыркы убакта эле милицияга эки жолу арыз жазган экен. Биринчисинде, анын унаасынын төрт дөңгөлөгүн жарып кетишкен. Аны алмаштыргандан кийин эртеси эле унаасынын дөңгөлөктөрүнүн буроолорун бошотуп салышкан. "Ушундай иштерди жасагандар мени кырсыкка кабылсын деген ниетте болушса керек" дейт.

Мындан бир жыл мурун да кимдир-бирөөлөр анын өмүрүнө кол салган экен. Ал адамдар кармалып, жазасын темир тордо өткөрүп жатыптыр.

“Ушулардын баарын көпкө айтпай келдим. Жактоочум экөөбүздүн артыбыздан аңдыгандар да болду” дейт Ассоль айым.

Эске салсак, Ассоль Молдакматова жергиликтүү телеканалдардын биринде "Ачык сүйлөшүү" деген ток шоу программасын эфирге алып чыгып келет.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!