Шайлообек Дүйшеев Бишкек шаарынын мэрине кайрылуу жасады

Шайлообек Дүйшеев Бишкек шаарынын мэрине кайрылуу жасады
17-Май 2019, Жума, 11:51

Кыргыз эл акыны Шайлообек Дүйшеев “Ала-Тоо” кинотеатрынын жанында сүрөтчүлөрдүн картиналарды саткан жайынын күн чыгыш тарабындагы аллеяны кыргыз китептерин сатуучулардын жайына айлантуу сунушу менен калаа башчысы Азиз Суракматовго жана мэриянын аппарат жетекчиси Балбак Түлөбаевге кайрылуу жасады.

Ал өзүнүн кайрылуусунда борбор шаардын чок ортосунда кыргыз китептерин саткан бир дагы дүкөн жок экендигин жана китеп сатып алгысы келген адамдар аны табышы кыйын болуп жаткандыгын белгиледи:

“Эгер Сиздер, “Ала-Тоо” кинотеатрынын ушул жерин кыргыз китептерин сатуучулардын жайына айлантууга чечим чыгарып берсеңиздер, ушу тапта кыргыз китептерин асфальтка коюп алып, көрүнгөн жерде сатып жүргөн китеп саткычтардын да, кыргыз жазуучуларынын да сообуна калат элеңиздер. Барар-бара бул жай китеп сатуучу эле жай эмес, кыргыз китептеринин тушоо кесчү, кыргыз акын-жазуучуларынын окурмандар менен жолугушуп турчу маданий жайына да айланат эле. Адабият кызматкерлеринин сообуна эле калып тим болбой, алардын алкышын алып, жакшы ишиңер менен тарыхта да калат элеңиздер. Ойлонуп көргүлөчү?“

Эл акыны учурунда Феликс Кулов Бишкек шаарынын мэри болуп турган кезинде сүрөтчүлөрдүн өтүнүчүн канааттандырып, Ала-Тоо кинотетрынын жанындагы аянтты аларга бөлүп бергенин жана аталган жайда сүрөтчүлөр сүрөттөрүн сатууга жана сүрөт сатып алууну каалаган адамдардын сүрөт сатып алуусуна жакшы мүмкүнчүлүктөр түзүлгөнүн кошумчалады. Шаардык мэрия азырынча акындын кайрылуусуна жооп бере элек.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР