Интернетте тараган видео үчүн үч милиционер жазаланды

Интернетте тараган видео үчүн үч милиционер жазаланды
19-Июнь 2019, Шаршемби, 12:06

Интернетте муздаткычка эки бала кирип чыга албай, тумчугуп калышкан видеону тарткандыгы үчүн Түп районунун ички иштер бөлүмүнүн үч милиционери жазаланды. Бул тууралуу Ички иштер министрлигинин басма сөз кызматы маалымдады.

Териштирүүнүн жыйынтыгы боюнча ИИБдин тартиптик жобосундагы, Этика кодексиндеги талаптарды одоно бузгандыгы үчүн жана милдеттерин так аткарбагандыгы үчүн милиционерлер дисциплинардык тартипте жазага тартылышты. Ысык-Көл ОИИБдин башчысынын буйругу менен Түп РИИБдин кызматкери Ж.Ч. кызматына толук ылайык келбөө боюнча эскертүү алса, Түп РИИБдин дагы бир кызматкери С.К.га катуу сөгүш жарыяланды. Ал эми Түп РИИБдин башчысынын орун басарына дисциплинардык жаза-эскертүү берилди.

Эскерте кетсек, Түп районунун Михайловка айлында 4 жана 6 жаштагы бир туугандар эски муздаткычка кирип чыга албай, тумчугуп калышкан. Алардын денеси бир нече сааттан кийин табылган болчу. Интернетте тараган видеодон муздаткычты ачып, балдардын денесин алып чыгып жаткан милиционерлердин кадрын көрүүгө болот.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!