Бөлмө гүлдөрүнө арналган пайдалуу кеңештер

 Бөлмө гүлдөрүнө арналган пайдалуу кеңештер
25-Июль 2018, Шаршемби, 15:14

Терезе алдындагы "кичинекей бакчабыз” көздү кубантып, жакшы маанай тартуулайт. Аларды туура карап, гүлдөр өздөрүн жакшы сезүүсү үчүн бардык жагдайды жасашыбыз керек. Бүгүн гүл өстүрүүдөгү пайдалуу кеңештерди сунуштамакчыбыз.

Кант
Кант — бөлмө гүлдөрүн коргоо үчүн колдонулган табигый жер семирткичтердин бири. Кантты топуракка сээп же суу менен аралаштырып куят. Эгер суу менен аралаштыра турган болсоңуз, 10 гр кантты 200 мл сууда эритесиз. Бул эритинди менен гүлдү жумасына эки жолу сугарып турасыз. Ошону менен катар, дарыканадан глюкоза сатып алып, 1 таблетка глюкозаны 1 л сууга эритип, бөлмө гүлдөрүн сугарса болот. Мындай эритиндилерди гүлдөрдүн жалбырактарына чачса да жакшы. Бул алсыз жана ооруп турган гүлгө жакшы жардам берет. Ал эми жакшы өсүп жаткан гүлгө мындай ыкманы колдонбой деле коюңуз.

Кофе

Кофе ичкенден кийин анын калдыгын төкпөңүз, аны топурак менен аралаштырыңыз. Бул жер семирткичтен кийин топурак борпоң боло түшөт. Ошону менен бирге, топурактын кычкылдыгы арта түшөт. Семирткич катары кофени гана эмес, чайдын чамасын да пайдаланышат. Бирок абайлаңыз, себеби топурактагы чайды чиркейлер жакшы көрөт.

Цитрус жана башка жемиштер

Бөлмө гүлдөрүн өстүрүүдө апельсин, мандарин жана банандын кабыгы жакшы жардам берет. Мындай семирткичти даярдоо үчүн апельсиндин же мандариндин кабыгын майдалап туурап, 1 литрлик банкага салып, тууралган кабыктар баткыдай кылып кайнаган суу куясыз. Бир күн тургандан кийин банканын ичиндеги кабыктарды алып таштап, анын ширесине 1 л банка толгончо таза суу куясыз. Андан соң гүлдөрдү сугара берсе болот.

Күл

Күл — магний, темир, фосфор, кальций жана күкүрт сыяктуу пайдалууу химиялык элементтерден турат. Гүлдөрдүн жакшы өсүүсү үчүн күлдү топурак менен аралаштыруу керек. Ошону менен катар, күлдөн суюк семирткич даярдоого болот. Ал үчүн 20 гр күлдү 100 мл сууга эритиңиз.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!