Прокуратура Садыр Жапаровдун ишин кайра карайт

Прокуратура Садыр Жапаровдун ишин кайра  карайт
26-Ноя. 2018, Дүйшөмбү, 09:16

Бишкек шаардык прокуратурасы жаңы жагдайларга байланыштуу камактагы саясатчы Садыр Жапаровдун ишин кайра кароону Биринчи Май райондук прокуратурасына тапшырды. Бул тууралуу “Азаттык” радиосуна Жапаровдун жактоочусу Шарабидин Токтосунов билдирди.

«Бишкек шаардык прокуратурасы менин жазган арызымды карап чыгып, “жаңы жагдай жок” деген Биринчи Май райондук прокуратурасынын токтомун жокко чыгарды. Башкача айтканда, жаңы жагдайлар кайра каралып, кошумча текшерүү жүргүзүү үчүн ишти кайра Биринчи Май райондук прокуратурасына тапшырышты. Райондук прокуратура 1-декабрга чейин жаңы жагдай боюнча кароо үчүн ишти райондук сотко жибериши керек»,-деди жактоочу.

Ушул жылдын 13-июнунда Жогорку сот экс-депутат Садыр Жапаровдун ишин карап, мурдагы чыккан чечимди күчүндө калтырган.

Ал эми анын жактоочусу мындай чечимге каршы экенин билдирип, жаңы жагдайлар боюнча шаардык прокуратурага кайрылган.

Камактагы саясатчы Садыр Жапаров Кылмыш-жаза кодексинин 227-беренеси (“Бийлик өкүлүн барымтага алуу”) боюнча айыпталып, Биринчи Май райондук соту былтыр 2-августта он бир жыл алты айга күчөтүлгөн тартиптеги абакка калтыруу чечимин чыгарган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!