Президент Германияга иш сапары менен барат

Президент Германияга иш сапары менен барат
13-Апр. 2019, Ишемби, 18:00

15-16-апрелде президент Сооронбай Жээнбековдун Германияга расмий визити болот. Президенттик аппараттын тышкы саясат бөлүмүнүн башчысы Данияр Сыдыков билдиргендей, визиттин алкагында Германиянын президенти Франк-Вальтер Штайнмайер жана Германия Федералдык Канцлери Ангела Меркель, ошондой эле Бундестаг Президенти Вольфганг Шойбле менен жолугушуулары божомолдонууда.

«Президент Сооронбай Жээнбековдун алдыдагы визити үчүн жакшы саясий негиз түзүлдү. Кыргызстан Борбор Азиядагы демократиялык өлкө катары Германия Федералдык Канцлери Ангела Меркелдин да, Германиянын Федералдык президенти Франк-Вальтер Штайнмайердин да урматтоосуна жана колдоосуна ээ болгон», — деди Данияр Сыдыков.

Ошондой эле Кыргызстанга заманбап фитосанитардык лабораторияны куруу жана кыргызстандык адистердин Бавария фитосанитардык лабораториясындагы стажировкасы тууралуу маселе да иштелип жатканы айтылат. Эки өлкөнүн ЖОЖдорунун ортосундагы изилдөөлөр чөйрөсүндөгү жана айыл чарба жана гидроэнергетика багытындагы адистерди даярдоо жөнүндө меморандумга кол коюу пландалууда.

Андан тышкары, Мамлекет башчысынын Германиядагы мекендештер менен жолугушуусу божомолдонууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!