Алмазбек Атамбаев башкы прокурорго кайрылуу жасады

Алмазбек Атамбаев башкы прокурорго кайрылуу жасады
18-Апр. 2019, Бейшемби, 17:13

КСДП партиясынын төрагасы, экс-президент Алмазбек Атамбаев Башкы прокурор Өткүрбек Жамшитовго кайрылуу жасады.

Ал өзүнүн кайрылуусунда Кыргызстан Социал-демократиялык партиясынын мүчөлөрүнүн бузулган укугун тез арада калыбына келтирүүнү, ошондой эле жасалган кылмышты токтоосуз жана калыс тергөөгө алууну талап кылды.

"КСДП тарабынан юстиция министри Жаманкуловдун жана аталган багытты тейлеген орун басары Есеналиевдин дарегине даярдалып жаткан укук бузуу туурасындагы анык маалымат күн мурунтан жана расмий түрдө жеткирилген. Юстиция министрлиги өлкөнүн экс-президенти жетектеген ири саясый партиянын расмий кайрылуусун көңүлгө алган жок жана ошондой эле акыркы жарым жылда КСДПнын тегерегиндеги кырдаалды коштогон коомдук резонансты ачык эле тоготкон жок”, - деди Атамбаев.

Кыргызстан Социал-демократиялык партиясы Юстиция министрлиги тарабынан юридикалык тараптардын Бирдиктүү мамлекеттик реестрине партиянын жетекчисин жана КСДПнын юридикалык дарегин өзгөртүү бөлүгүнө жакында киргизилген өзгөртүүлөрдү мыйзамсыз деп эсептейт.

Юстиция министрлиги “Атамбаевсиз КСДП” кыймылынын төрагасы Сагынбек Абдрахмановду КСДПнын лидери катары каттап, партиянын юридикалык дарегин өзгөрттү.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!