Сулайманов: Президент сүйлөп жатса, губернаторлор уктап жатат

Сулайманов: Президент сүйлөп жатса, губернаторлор уктап жатат
24-Апр. 2019, Шаршемби, 17:07

“Бир Бол” фракциясынын лидери Алтынбек Сулайманов губернаторлорду жоюу боюнча маселени бир нече жолу көтөргөнү менен, премьер-министр тарабынан чечкиндүү кадамдарды жасабай жатканын сынга алды.

“Президент жыйында сүйлөп жатса, губернаторлор уктап жатат. Аларды жумуштан алыңыз. Алардын тагдырын май айынын ичинде чечиңиз. Чечпесеңиз Конституциядагы укугубуз менен биз сизге чечип беребиз. Жыйында уктаган губернаторлордун эмне кереги бар?” – деди депутат.

Премьер-министр Мухамммедкалый Абылгазиев административдик-территориалдык реформа жасалышы керектигин жана бул маселе боюнча атайын комиссия түзүлгөнүн айтты.

“Менин оюм боюнча бир звено ашыкча. Аны чогулуп чечели. Комиссияга кирген кээ бир адамдар “Райондор кереги жок, облус калып, айыл өкмөттөрдүн бардыгын ирилештириш керек” деп айтып жатат. Кээ бирлери “облустарды жойгула, райондор калсын” деп жатат. Ушунун баарын таразап, экономикалык жагын карап, ойлонуп чечели”.

Бүгүн Жогорку Кеңеште Өкмөт 2018-жылдагы иштери тууралуу отчет берип жатат. Өкмөттүн азыркы курамы өзүнүн милдеттерине 2018-жылдын апрель айына баштап киришкен.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!