Абылгазиев: Президенттин жыйынында уктаган кызматкерлерге катуу чара көрүлөт

Абылгазиев: Президенттин жыйынында уктаган кызматкерлерге катуу чара көрүлөт
25-Апр. 2019, Бейшемби, 10:59

Бүгүн, 25-апрелде Өкмөт башчы Мухаммедкалый Абылгазиев 2018-жылдагы аткарылган иштери тууралуу Жогорку Кеңеште отчет берип жатат.

Депутат Тынчтык Шайназаров президент катышкан форумда уктап калган кызматкерлерге кандай чара көрүлө турганына кызыкты.

“Жакында президентибиз Сооронбай Шарипович Ошто жыйын өткөрүп жатканда, бир топ жетекчилер уктап жатты. Аларга кандай чара көрүлөт?” – деди депутат.

Премьер-министр жыйында жетекчилердин уктап калганы уят көрүнүш экенин айтып, аларга катуу чара көрө турганына убада берди.

“Катуу чара көрүлөт. Ал окуя үч күн мурун болду. Биз бул жерде болуп жатабыз. Видеосун көрүп чара кабыл алабыз, бул уят иш болду”, – деди Абылгазиев.

Ал эми президенттин өкүлү Курманбек Дыйканбаев президент катышкан убакытта бир дагы жетекчи уктаган эместигин айтты.

“Сооронбай Шарипович 10:00дөн 12:00гө чеийн болду. Видеонун баарын көрүп чыктык, бир дагы жетекчи уктаган эмес экен. Туура эмес маалымат болуп жатат. Түштөн кийин да форум үч-төрт саатка уланган. Ошол убакта уктап кетсе, аткаруу бийлиги чара көрөт болуш керек”.

22-апрелде Ош шаарында президент Сооронбай Жээнбековдун катышуусунда өткөн “Санарип Кыргызстан: Региондорду өнүктүрүү” телекоммуникациялык форумунда уктап жаткан кызматкерлердин видеосу социалдык тармактарга тарап кеткен. Видео интернет колдонуучулардын катуу сынына кабылган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!