Жогорку сот Садыр Жапаровго өкүм чыгарды

Жогорку сот Садыр Жапаровго өкүм чыгарды
30-Апр. 2019, Шейшемби, 17:29

Бүгүн, 30-апрелде жаңы жагдайларга байланыштуу Садыр Жапаровдун иши Жогорку сотто каралып, соттук коллегия анын жаза өтөө мөөнөтүн бир жарым жылга кыскартуу чечимин чыгарды.

23-апрелде соттук коллегия отурумду 30-апрелге жылдыруу чечимин чыгарган. Мындай чечимге Жапаровдун жактоочусу Шарабадин Токтосуновдун соттун курамына, төрагалык кылган судьяга ишеним көрсөтпөө өтүнүчү себеп болгон.

Жактоочулар Садыр Жапаровдун күнөөсү жок экендигин белгилеп, аны актоону суранышты. Ал эми мамлекеттик айыптоочу Жапаровду10 жылга эркинен ажыратууну суранды.

Камактагы саясатчы Садыр Жапаров “Бийлик өкүлүн барымтага алуу” боюнча айыпталып, Биринчи Май райондук соту былтыр 2-августта он бир жыл алты айга күчөтүлгөн тартиптеги абакка калтыруу чечимин чыгарган. Шаардык сот, Жогорку сот да бул чечимди өзгөртүүсүз калтырган эле.

23-апрелде Садыр Жапаровдун тарапташтары Жогорку соттун алдында митинг өткөрүшкөн.

(Сүрөт: Азаттык)

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!