Жогорку Кеңеш Кызыл-Омпол уран кени боюнча өкмөттүн маалыматын угуп жатат

Жогорку Кеңеш Кызыл-Омпол уран кени боюнча өкмөттүн маалыматын угуп жатат
2-Май 2019, Бейшемби, 13:05

Коомчулукта Кызыл-Омпол уран кенин чалгындоого каршы нааразычылыктар көп жаралгандыктан Жогорку Кеңеш калктын радиациялык коопсуздугун камсыздоо боюнча көрүлүп жаткан чаралары жөнүндө өкмөттүн маалыматын угуп жатат.

Биринчи вице-премьер-министр Кубат Боронов азыркы учурда Кызыл-Омпол уран кениндеги жумуштар толугу менен токтотулганын, анда колдонулган техникалардын баары чыгарылып кеткенин билдирди.

“Кыргызстандагы ЮрАзия” компаниясына элдин нааразычылыган улам, такыр токтотуу боюнча чечим кабыл алынып, 22-апрелде премьер-министрдин чечими менен Кызыл-Омполдогу жумуш таптакыр токтотулган. Бүгүнкү күнү техникалар чыгарылып, инфраструктура объектилеринин баары мөөр коюлуп бекитилген”, – деди Боронов.

27-апрелде Кызыл-Омпол уран кенинин казылышына каршы митинг өтүп, анда Кыргызстандын аймагы боюнча уранды казуу иштерине биротоло тыюу салуу, ошондой эле буга чейин уран кенин чалгындоого берилген лицензияларды токтоосуз түрдө жокко чыгаруу талабы айтылган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!