Жогорку сот Текебаев менен Чотоновду абакта калтырды

Жогорку сот Текебаев менен Чотоновду абакта калтырды
3-Май 2019, Жума, 11:58

Бүгүн, 3-майда жаңы кабыл алынган мыйзамдарга жана жаңы жагдайларга ылайык, камактагы саясатчы Өмүрбек Текебаев жана мурунку Өзгөчө кырдаалдар министри Дүйшөн Чотоновдун "Мегакомго" байланыштуу иши Жогорку сотто каралды.

Текебаев менен жактоочулары буга чейин чыккан соттун чечимдерин жокко чыгарып, ишти кайра кароого өтүнүчүн келтирди. Мамлекеттик айыптоочу жактоочулардын сөзүнө макул эместигин билдирди.

Натыйжада ишти караган судья Текебаев менен Чотоновдун жактоочуларынын өтүнүчүн канааттандыруусуз калтырды.

“Текебаев менен Чотоновго колдонулган үй-мүлкүн кофискациалоо жазалары алынып салынсын. Сотук актылардын калган бөлүктөрү өзгөртүүсүз калтырылсын. Токтом акыркы, даттанууга жатпайт”, – деди судья.

23-апрелде прокурор судьяга материалдар менен таанышып чыгуу үчүн соттук отурумду башка күнгө жылдыруу өтүнүчүн келтирип, судья өтүнүчтү канааттандырып, отурумду 3-майга дайындаган эле.

Өмүрбек Текебаев менен Дүйшөн Чотоновго орус ишкери Леонид Маевскийден “1 млн. доллар пара алган" деген айып тагылып, сот сегиз жылга эркинен ажыраткан.

Ал эми Леонид Маевский өзү “бирөөгө шек келтире турган маалыматты жайылтпоо үчүн 37,5 млн. доллар пара алган” деп айыпталып камакка алынган.

(Сүрөт: Азаттык)

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!