Балык улоочу торлорду колдонууга тыюу салуучу мыйзам долбоору жактырылды

Балык улоочу торлорду колдонууга тыюу салуучу мыйзам долбоору жактырылды
10-Июнь 2019, Дүйшөмбү, 17:39

Кыргызстандын аймагына балык уулоочу синтетикалык торлорду жана электр менен кармоочу тутумдарды алып келүүгө, өндүрүүгө, даярдоого, сатууга жана пайдаланууга тыюу салууну белгилеген мыйзам долбоору профилдик комитетте жактырылды.

Аталган мыйзам долбоор суу биологиялык ресурстарды, алар жашаган чөйрөнү сактоо жана жагымдуу курчап турган чөйрөнү камсыз кылуу максатында иштелип чыкты.

“Мыйзам долбоорунда юридикалык мааниге ээ болгон түшүнүктөрдү ачып көрсөтүү сунуш кылынат. Алсак, «балык уулоочу синтетикалык торлор», «электр менен кармоочу тутумдар» түшүнүктөрү киргизилет, бул укуктук жөнгө салуунун чектерин так белгилөөгө мүмкүндүк берет”, – дейт бул мыйзам долбоорунун авторлорунун бири Жыргалбек Турускулов.

Балык уулоочу торлор синтетикалык материалдардан жасалгандыктан бекем жана узак мөөнөттүү болуп саналат.


Бул болсо алардын көлдөрдө жана башка суу объекттеринде топтолушуна алып келүүдө. Буга байланыштуу көлдөр жана башка суу объектилери синтетикалык материалдардан жасалган эбегейсиз зор сандагы торлор менен булганууда. Мындай торлордо балык, ошондой эле сууда сүзүүчү канаттуулар чырмалып жана өлүп калат, ушундан улам көлмөлөр жана көлдөр торлорго чырмалып калган балыктар үчүн кадимки көрүстөнгө айланууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!