Сооронбай Жээнбеков: Бүгүн биз тарыхый чечим кабыл алабыз

Сооронбай Жээнбеков: Бүгүн биз тарыхый чечим кабыл алабыз
13-Июнь 2019, Бейшемби, 11:56

Бүгүн биз тарыхый чечим кабыл алабыз – биздин мамилелерди сапаттык жаңы деңгээлге – ар тараптуу стратегиялык кызматташтыкты тереңдетүү баскычына көтөрөбүз.

Бул тууралуу президент Сооронбай Жээнбеков бүгүн, 13-июнда Кытай мамлекетинин президенти менен болгон жолугушуусунда айтты.

Мамлекет башчысы Кытайдын төрагасы менен болгон быйылкы жылдагы үчүнчү жолугушуу өлкөлөр ортосундагы стратегиялык кызматташтыктын жогорку деңгээлин жана активдүү динамикасын көрсөтүп турганын белгиледи.

«Сиздин кыргыз-кытай ар тараптуу стратегиялык кызматташтыкты өнүктүрүү маселелерине жеке көңүл буруп жатканыңызды биз жогору баалайбыз. Сиздин колдооңуз менен Кыргызстанда республиканын экономикасын өнүктүрүүгө багытталган масштабдуу долбоорлор жүрүп жатат. Көз карандысыздык жылдары ичинде көрсөтүлгөн жардам үчүн биз кытайлык досторубузга ыраазыбыз», - деди С. Жээнбеков

Президент Кытай лидерин бул мамлекеттик сапары абдан жемиштүү болуп, кыргыз-кытай мамилелериндеги жаркын жана тарыхый учур болот деп ишене турганын билдирди.

Мамлекет башчысы терроризм, экстремизм жана сепаратизм менен күрөшүү маселелери боюнча Кыргызстан Кытай менен бирдиктүү позицияны карманарын кошумчалады.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!