Депутаттар Атамбаевдин кол тийбестигин алуу боюнча токтом кабыл алды

Депутаттар Атамбаевдин кол тийбестигин алуу боюнча токтом кабыл алды
20-Июнь 2019, Бейшемби, 15:59

Бүгүн, 20-июнда парламент “Алмазбек Атамбаевдин экс-президент макамын алуу жана ага күнөө коюу” маселесин карады.

Натыйжада экс-президенттин кол тийбестигин алуу боюнча токтом долбоору добуш берүүгө коюлуп, жыйынга катышкан 105 депутаттын 100ү "макул", калган бешөө "каршы" деген добуш беришти.

Демилгелүү топтун айыптоосунда Алмазбек Атамбаев президент болуп туруп, бийликтин бардык бутактарын өзүнүн кызыкчылыгына пайдалануу менен уюшкан кылмыштуу топ түзгөндүгү, Жогорку Кеңештин депутаттарын, судьяларын, коомдук ишмерлерди, ошондой эле журналисттерин анын режимине каршы чыккандыгы үчүн куугунтукка алып, репрессияга туш кылгандыгы көрсөтүлгөн.

Депутат Жанар Акаев депутаттарга кайрылып, эгер парламент өз убагында мыйзамсыз иштерге каршы турса, азыркыдай окуялар болбойт эле деп эскертти.

Алмазбек Атамбаевдин кол тийбестигин ажыратуу маселеси 12-июнда көтөрүлдү. Төрага Дастан Жумабеков баш болгон бир нече депутаттар Алмазбек Атамбаевдин митингде сүйлөгөн сөздөрүн сынга алышып, ага тиешелүү укуктук баа берүү сунушун айтышкан.

Атамбаев баштаган КСДП партиясы бул айыптоолорду “чуулгандуу корруцпиялык иштерден элдин көңүлүн башка жакка буруу аракети” катары сыпаттап жатат.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!