Президент премьер-министр менен өлкөнүн социалдык-экономикалык абалын талкуулады

Президент премьер-министр менен өлкөнүн социалдык-экономикалык абалын талкуулады
28-Июнь 2019, Жума, 14:31

Президент Сооронбай Жээнбеков бүгүн, 28-июнда, премьер-министр Мухаммедкалый Абылгазиев менен жолукту.

Анда өлкөнүн мындан аркы социалдык-экономикалык өнүгүүсү боюнча чаралар, пенсияларды жогорулатуу жана социалдык тармактын кызматкерлерине айлык акыларын көбөйтүүнүн көлөмдөрү жана мөөнөттөрү талкууланды.

Президент аймактык өнүгүү, санариптештирүү, анын ичинде салыктык процедураларды фискализациялоо жана «Түндүк» ведомство аралык электрондук системаны киргизүү, «Коопсуз шаар» долбоорунун экинчи фазасын ишке ашыруу боюнча чараларды тездетүү зарылдыгына көңүл бурду.

Ал ошондой эле республикалык бюджеттин толтурулушу боюнча пландык көрсөткүчтөрдү толук көлөмдө аткаруу жана мамлекеттик казынанын чыгаша бөлүгүнө көзөмөлдү күчөтүү зарылдыгын баса белгиледи.

«Казынанын киреше бөлүгүн толук эмес аткарган мамлекеттик органдардын жетекчилери жеке жоопкерчилик тартышы керек», — деди президент.

Мындан тышкары, райондук борборлордо жолдорду оңдоо, Түндүк-Түштүк, Бишкек-Кара-Балта, Ош-Баткен-Исфана-Худжант жана башка республиканын негизги автожолдорун куруунун жүрүшүнө көзөмөлдү күчөтүү зарылдыгы белгиленди.

Премьер-министр Президент көңүл бурган багыттардын бардыгын ишке ашыруу катуу көзөмөлгө алынаарын айтты.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!
КӨП ОКУЛГАНДАР