Жанар Акаев: Солтон-Сары маселесин көтөргөн лидерлерге куугунтук болбошу керек (видео)

Жанар Акаев: Солтон-Сары маселесин көтөргөн лидерлерге куугунтук болбошу керек (видео)
26-Авг. 2019, Дүйшөмбү, 16:50

Солтон-Сары маселесин көтөргөн лидерлерге куугунтук болбошу керек. Мындай пикирин депутат Жанар Акаев Нарын облусунун тургундары менен болгон жолугушууда билдирди.

Ал кыргыз өкмөтүндө жергиликтүү эл менен тил табышып, дипломатия жолу менен маселе чече ала турган кызматкер жок экенине таң калганын жашырган жок. Мындан улам Солтон-Сары кениндеги көйгөйдү көтөргөн активисттерди кысымга албай, маселени эл менен бирге чечүү керектигин белгилеп өттү:

“Биринчи кезекте Солтон-Сары маселесин көтөрүп жаткан лидерлерге куугунтук болбошу керек. Алар маселени туура коюп “элге, жерге зыяны тийбесин, ата-бабаларыбыздан келаткан байлыгыбызды сактайлы” деген ак ниет ою менен чыгып жаткандарын эл өкүлү катары күч органдарына, бийликке, өкмөткө түшүндүрүшүбүз керек”, – деди Акаев.

Жанар Акаев мындан сырткары Солтон-Сары кенине берилген лиценциянын мыйзамдуулугун карап чыгып, мыйзам бузган кызмат адамдарын жоопко тартуу маселесин да көтөрдү.

25-августта эл өкүлдөрү Жанар Акаев, Рыскелди Момбеков жана Алтынбек Жунус уулу Нарын облусунун жергиликтүү тургундары менен жолугушуп, калктын көйгөйлөрү менен жеринде таанышып келишти.

«Zhong Ji Mining Company» компаниясы Солтон-Сары кенинде 2009-жылдан тартып иштейт.

«Zhong Ji Mining Company» компаниясы кен пайдалануу укугуна биринчи лицензия 2009-жылы берилген. Кийин уруксат кагаздарын 2011-жылы Замирбек Эсенаманов, 2014-жылы Дүйшөнбек Зилалиев, 2018-жылы Сүйүнтбек Аликеев тарабынан узартылган.

Акыркы уруксат кагазын 2018-жылы 9-февралда Сапар Исаков башында турган өкмөттүн иши мезгилинде алган.

3228 АЕ лицензиясы — 2013-жылдын 4-февралында 2033-жылдын 4-февралына чейин Солтон-Сары кенинин Бучук участкасынан алтын казууга 20 жылга уруксат берилген.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!