УКМК: Раимбек Матраимов күбө катары суракка чакыртылды

Тилек Нурбеков

Бажы кызматынын төрагасынын мурдагы орун басары Раимбек Матраимов күбө катары Улуттук коопсуздук боюнча мамлекеттик комитетке суракка чакырылды. Бул тууралуу аталган мекеменин басма сөз кызматы кабарлады.

Маалыматкуа караганда, Раимбек Матраимов журналисттик иликтөөдө жарыяланган баардык жагдайлар боюнча суралат.

“Учурда аталган сотко чейинки териштирүүнүн алкагында Айеркен Саймаитиге карата болгон коркутуулар боюнча маалыматтарды толук кандуу жана объективдүү жүргүзүү максатында баардык жагдайларды аныктоого багытталган тиешелүү тергөө иш чаралары жүрүп жатат”, – деп түшүндүрдү УКМК.

22-ноябрда "Азаттык" радиосу “Бажыдагы миллиондор: калкалоо жана карактоо" аттуу иликтөөсүн жарыялады. Анда бажыдагы товар өткөрүүнүн көмүскө схемалары, миллиондогон акчаларды адалдоо тууралуу сөз болот.

Коопсуздук кеңешинин катчысы Дамир Сагымбаев журналисттик иликтөө боюнча мекемелер аралык тергөө тобу түзүлгөнүн, иликтөөдө аты аталган адамдар, анын ичинде Раимбек Матраимов да тергөөгө чакырылышы мүмкүн экендигин айткан.

Ал эми Бажы кызматынын төрагасынын мурдагы орун басары Раимбек Матраимов акыркы эки жылдан бери кайсы бир саясий топтор каралоо максатында түрдүү божомолдорду, ар кандай жалган маалыматтарды таратып келгенин айтып, өзүнө байланыштуу бардык суроолорго жооп берүүгө даяр экендигин билдирген.

Сүрөт: Акипресс