Мавлянова: Өкмөт маданият министринин да жазасын карасын

Тилек Нурбеков

Жогорку Кеңештин депутаты Махабат Мавлянова Гапар Айтиев атындагы музейде феминисттер уюштурган көргөзмөнү сынга алды.

Ал мындай көргөзмөлөр эс алуучу жайларда, жеке менчик мекемелерде уюштурулса бир жөн эле дейт.

“Жалпы эле Орто Азия эли үчүн ыплас, абийирсиздик деп эесептелинген жылаңач аялдардын көргөзмөсүн маданиятыбыздын туу чокусу болгон музейде уюштуруу – бир эле музейдин директорунун күнөөсү эмес. Маданият министрлиги так ушул улутубуздун өзгөчөлүгүн эске алып, маданиятыбызды жайылтышы керек болчу. Ошондуктан мен ойлойм, бул жерде маданяит министринин да күнөөсү бар. Өкмөт ошонун жазасын да карасын”, – деди Мавлянова

29-ноябрда Гапар Айтиев атындагы көркөм-сүрөт музейинде аялдардын экономикалык эркиндигин коргоо максатында «Феминале» деп аталган феминисттик көргөзмө өткөрүлгөн.

Өзүлөрүн жарандык активистмин деп эсептегендер бул иш-чарада жылаңач денесин көрсөткөн кыздарды кескин сынга алышып, бир катар жооптуу кызматкерлердин иштен кетүүсүн талап кылып митингге чыгышкан.

Аларды кабыл алган Маданият жана туризм министри Азамат Жаманкулов “феминалле” деген иш-чара боюнча маданият министрлигин расмий позициясын билдирип, буларды айткан:

“Маданият жана туризм министрлиги искусство үйүндө жылаңач денесин көрсөткөн кыздардын болуусуна каршылыгын билдирет жана жана заманбап искусствонун мындай провокациялык чакырыктарын колдобойт”.

Бул митингден кийин Гапар Айтиев атындагы көркөм-сүрөт музейинин директору Мира Жангарачева өзүнүн жазган арызынын негизинде кызматын тапшырып, музейдеги бир катар экспонаттар алынып салынган.