Ырчынын баласы жардамга муктаж

Ырчынын баласы жардамга муктаж
8-Фев. 2019, Жума, 13:17

Убагында кыргыз эстрадасында "Малышка Би", "Беги за ней" ыры жана "Жатакана" сериалындагы ролу менен таанылган ырчы Нурбек Савитахуновдун уулу жардамга муктаж. Бул тууралуу ал интернеттеги баракчасына чыгармачылыктан алыстап кеткенинин себебин түшүндүрүп жатып жазган:

"Бир нече жыл мурун чыгармачылыктан алыстап кеттим. Мунун жүйөлүү себептери бар. 2015-жылы жубайым Альбина экөөбүз тун наристелүү болуп, ага Артур аттуу ысым ыйгарганбыз. Уулубуз 6 айынан тарта жапайы жана үй жаныбарларынын аттарын билип, 2 жашында тамга таанып, санаганды үйрөнүп алган. Жер-жемиштердин аттарын атап, мен билбеген геометриялык формулаларды айтып, эки тилде эркин сүйлөшө алчу. Ырларды да дал өзүндөй кылып аткарып койчу. 2-уулубуз Алан төрөлгөнгө чейин Артур бат-баттан ооруп, түнү бою уктабай, ачуулуу болуп, адамдын көзүнө тик карабай, атынан чакырсаң дагы маани бербей калды. Ал түшүнүксүз тилде сүйлөп, түз жерден кулап, жерге жатып, колуна тийген нерсени жегенге өттү. Эч нерсеге кызыгуусу жок болуп, коркуп, коргонуу инстинкти жоголду. Артур өзүнүн дүйнөсүндө, өз кызыгуулары менен алек болуп калган. Бирок ал бизге муктаж болгон кезде ар дайым жанында болдук. 3 жашка чыкканда дарыгерлер ага аутизм синдрому деген диагноз коюшту. Жубайым экөөбүз болгон күч-аракетибизди жумшап, дарылоого кириштик. Артурдун чоң энелеринин жардамы менен дарылануусуна 13 миң доллар каражат кетирдик. Буюрса, уулубузда жакшы өзгөрүүлөр бар. Бирок толук кандуу калыбына келүүсү үчүн дагы убакыт жана каражат керек. Учурда уулубуз үчүн ар бир күн, ар бир саат маанилүү. Биз Артурду толук айыктыруу үчүн 18 айлык реабилитация борборунан дарылануубуз кажет. Буга 45 миң доллар талап кылынат. Андыктан кол сунган адамдардын ар бирине Альбина экөөбүз ыраазы болобуз. Биздин аракетибиз жана силердин айкөлдүгүңөр менен уулубуз айыгарына ишенебиз", - дейт Нурбек Савитахунов.


Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!