​Жоголгон футболчунун учагы табылды

​Жоголгон футболчунун учагы табылды
5-Фев. 2019, Шейшемби, 17:07

Франциянын түндүк - батышындагы Котантен жарым аралында атактуу футболчу менен жоголгон учак 12 күндөн кийин табылды. Бул тууралуу Британ авиациялык кырсыктарды изилдөө кызматы билдирди.

Маалыматка ылайык “Кардифф Сити” футбол клубунун футболчусу Эмилиано Сала жоголгон бир кыймылдаткычтуу Piper PA-46 "Malibu" учагы Ла-Манш аралынан табылды. Алдын-ала маалыматтарга караганда учактан бир адамдын жансыз денеси табылгандыгы кабарланууда. Учурда бул маалымат такталып жатат.

Эсиңиздерге сала кетсек, 22-январь күнү кечинде бир кыймылдаткычтуу Piper PA-46 "Malibu" учагы сапарга чыккан. Андагы аргентиналык 25 жаштагы чабуулчу Эмилиано Саланын учагы 19:15 убактысында радардан жоголуп кеткен. Андан бери учак табылбай суунун алдынан издөө башталган.

Эмилиано Сала 25 жаштагы аргентиналык футболчу. Аны “Кардифф Сити” футбол клубу 17 миллион долларга “Нант” клубунан сатып алган. Былтыркы сезондо Эмилиано Сала 13 гол киргизген. Ал “Нант” клубунда 2015-жылдан бери ойноп келаткан. 117 беттешүүгө катышып, 42 гол киргизген.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!