Тамеки чеге коюшуп, кафе өрттөштү

Шаххан Мырзабеков

Бишкекте этиятсыздыктын кесепетинен “Мангал” кафесинде өрт чыкты. Бул тууралуу Өзгөчө кырдаалдар министрлигинен билдиришти.

Маалыматка ылайык, Бишкек шаарынын Аалы Токомбаев жана Байтик Баатыр көчөлөрүнүн кесилишиндеги “Мангал” кафесинде 21:40 чамасында чыккан. Өрттү өчүрүүгө 3 өрт өчүрүү бөлүмү тартылып, тилсиз жоо кечки саат 22:20 чектөөгө алынып, түнкү саат 00:37де толугу менен өчүрүлгөн.

“Өрттүн кесепетинен 300 чарчы метр металл чатыр, жыгач тактай полу, 2 муздаткыч, 10 отургуч жана бар тирөөчтөр күйүп кеткен. Курмандыктар жана жабыркагандар жок. Тилсиз жоо тамеки чегүүдөгү этиятсыздыктан келип чыкканы аныкталды”,- деп айтылат маалыматта.