Сымап камтылган товарлары ташып келүү жөнгө салынат

Сымап камтылган товарлары ташып келүү жөнгө салынат
16-Апр. 2018, Дүйшөмбү, 11:26

Жогорку Кеӊештин Бюджет жана финансы боюнча комитети сымап камтылган товарларды жана алардын калдыктарын урунуу жаатында экономикалык механизмдерди киргизүү максатында иштелип чыккан “КРнын айрым мыйзам актыларына өзгөртүүлөрдү киргизүү жөнүндө (сымап камтылган товарлары ташып келүүнү жөнгө салууга тиешелүү)” мыйзам долбоорунун концепциясын жактырды. Бул тууралуу бүгүн, 16-апрелде Жогорку Кеңештин басма сөз кызматы кабарлады.

Демилгечилер – депутаттар тобу.

Демилгечилердин айтымында, иштен чыккан сымап камтылган буюмдар уулуу сымаптын жана башка зыяндуу заттардын адамдын байыр алуу чөйрөсүнө чыгуу булагы болуп саналгандыктан, аларды тандап чогултуу жана кайра иштетүү зарылдыгы жаралууда. Ошондон улам, экологиялык жагымсыз өнүмдөргө атайын төлөмдөрдү киргизүү, алынган каражаттарды экологиялык таза технологияларды иштеп чыгуу чаралары каралууда.

Өлкө аймагында жүгүртүүдөгү сымап камтылган өнүмдөрдүн жетиштүү саны анын калдыктарынын көбөйүшүнө, демек, экологиялык тобокелдиктердин деңгээлинин жогорулашына алып келет. Мындай товарлардын түрлөрүн өндүрүүнү жана ташып келүүнү чектөөгө, ошондой эле аларды чогултуу жана кайра иштетүү үчүн карыжылык базаны камсыз кылууга багытталган экономикалык механизмдерди киргизүү чаралары каралууда.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!