Мамлекеттик мүлктү башкаруу натыйжалуулугу жогорулайт

Мамлекеттик мүлктү башкаруу натыйжалуулугу жогорулайт
13-Март 2018, Шейшемби, 13:50

Премьер-министр Сапар Исаков мамлекеттик ишканаларды башкаруу тутумун реформалоо чараларын талкуулоо боюнча жумушчу кеңешме өткөрдү. Бул тууралуу өкмөттүн аппаратынан билдиришти.

Өкмөт башчы алардын ишинин натыйжалуулугун жогорулатуу максатында стратегиялык пландаштырууну иштеп чыгуунун өзгөчө маанисин белгиледи. Премьер-министрдин айтымында, бүгүнкү күндө көптөгөн мамлекеттик ишканаларда төмөнкү экономикалык көрсөткүчтөр байкалууда, ал негизинен компаниялардын начар менеджментине байланыштуу келип чыгууда.

Экономика министри Артем Новиков мамлекеттик мүлктү башкаруу жаатындагы негизги көйгөйлөргө кенен токтолду. Анын айтымында, алардын катарына мамлекеттик ишканалардагы натыйжалуулуктун төмөндүгү жана алардын чыгашалуулугу, көзөмөлдөөчү тармактык мамлекеттик органдар тарабынан тийиштүү көзөмөлдүн жоктугу, мамлекеттик ишканалардын ишин жөнгө салуучу борбордук ченемдик-укуктук жөнгө салуунун, мамлекеттик компаниялардагы экономикалык негизделген саясаттын жана стратегиянын ж.б. жоктугу кирет.

Новиков кошумчалагандай, премьер-министрдин тапшырмасы боюнча, көйгөйлөрдү чечүү үчүн Экономика министрлиги тарабынан иштеп жаткан мыйзамды өзгөртүү боюнча мыйзам демилгелеринин пакети даярдалып, мамлекеттик мүлктү башкаруу натыйжалуулугун жогорулатууга багытталган жаңы ченемдик-укуктук актылардын долбоору иштелип чыккан.

Сапар Исаков мамлекеттик ишканаларды башкаруу жаатында коррупциялык тобокелдиктерди четтетүү максатында жогоруда аталган демилгелерди тездетүүнү, ошондой эле мамлекеттик ишканалардын финасылык-чарбалык ишмердүүлүгүн текшерүү үчүн ири аудитордук команияларды тартуу мүмкүндүгүн карап чыгууну тапшырды.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!