"Жашыл өлкө, таза аба!” акциясы жаштарды бириктирди (видео)

15-Март 2019, Жума, 19:56

Бүгүн, 15-мартта Жогорку Кеңештин депутаты Жанар Акаевдин демилгеси менен уюштурулган "Жашыл өлкө, таза аба!" аттуу акциясы болуп өттү. Бул иш-чарага жаш активисттер, шаар тургундары, мектеп окууучулары катышып, Жаш гвардия бульварына 200 жаш көчөт отургузулду. Азыркы учурда шаардын экологиясы - негизги көйгөйлөрдүн бирине айланганын белгилеген Жанар Акаев калааны жашылдандыруу акциясына катышкан бардык активдүү жаштарга ыраазычылык билдирди:

“Соңку учурда абанын булганышы – олуттуу көйгөйгө айланды. Бул маселе ар бирибиздин жашообузга терс таасирин тийгизип жатат. Муну чечүү үчүн ар бир кыргызстандык салымын кошуш керек деп ойлойм. Кыргыздарда өзү жакшы жышаан болсо баарыбыз бириге калып, ынтымакташа калган салтыбыз бар. Бишкек мэриясы пайдалуу жаш дарактарды кыйбай, тескерисинче көбөйтүүнүн үстүндө иштешсе, биз бардык жагынан колдоого даярбыз”.


Белгилей кетсек, Абдывахаб Нурбаев, Жанар Акаев, Мирлан Бакиров баштаган депутаттар “Таза аба” долбоорун сунуштап, бир нече мыйзамдарга өзгөртүү киргизүүнү демилгелөөдө. Эл өкүлдөрүнүн сунушу менен “Абаны булгоонун булактары” жөнүндө аналитикалык изилдөө да жүргүзүлгөн. Бул изилдөөнүн негизинде абанын булгануусуна жана айлана-чөйрөгө терс таасирин тийгизген зыяндуу заттарды кыскартууга багытталган мыйзам долбоору иштелип жатат.
Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!