Нафил Орозо деген эмне?

Нафил Орозо деген эмне?
27-Май 2019, Дүйшөмбү, 10:31

Мусулмандардын парз кылынган ыйык Рамазан айындагы Орозодон тышкары кармала турчу Нафил (кошумча) орозолор да бар. Нафил Орозо күнөөлөрдүн кечирилишине жана чексиз сооп табууга өбөлгө болот. Биз дүйшөмбү жана бейшемби күнкү кармалчу Орозого токтолобуз.

Сүйүктүү пайгамбарыбыз Мухаммед ар дүйшөмбү жана бейшемби күндөрү Орозо кармаган. Ал эмнеге ушул күндөрү кармаганы тууралуу, сахабалардын бири Абу Хурайра баяндаган хадисте: Пайгамбарыбыз Мухаммед “Адамдардын жасаган амалдары Жаратканга дүйшөмбү жана бейшемби күндөрү жеткирилет. Менин амалдарым, мен Орозо кармап жатканда жеткирилишин каалайм”,- деген экен.

Сахаба Абу катаада аль-Ансари дүйшөмбү күнү кармала турчу Орозо тууралуу сураганда. Ал: “Бул күнү мен жарык дүйнөгө келгем жана дал ушул күнү мага алгачкы аян түшүрүлгөн”,- деп жооп берген.

Ошондой эле Пайгамбарыбыз Мухаммед: “Дүйшөмбү жана бейшемби күндөрү Аллах урушуп кеткен эки адамдан башка бардык мусулмандын күнөөсүн кечирет. Ал эми урушуп кеткен адам тууралуу, “Ал экөө элдешкенче жөн койгула” деген экен. Нафил орозолор бир гана сооп таап күнөөлөрдүн кечирилишинде эмес, адамдын ден-соолугуна да олуттуу пайдасын тийгизет. Бул тууралуу хадисте: “Орозо кармагыла- ден соолукта болосуңар”,- деп айтылган.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!