Орозо айт

Орозо айт
29-Май 2019, Шаршемби, 10:03

Пайгамбарыбыз (САВ) мадинага көчүп келгенде, алардын эки майрамы бар экендигин көргөн. Бул майрам күндөрү түрдүү оюндар ойнолуп, мадиналыктар шаңга толоор эле. Бул абалды көргөн соң пайгамбарыбыз (САВ) “Алла Таала бул эки майрамдын ордуна андан жакшыларын-Орозо айт менен, Курман айт күндөрүн белгиледи”. Ошентип, пайгамбарыбыздын куттуу кылымынан бери, бүткүл ислам дүйнөсүндө, бир жылда эки жолу диний майрам өткөзүлүп келүүдө.

Мусулмандар бир ай бою саарлыкка турушту, саарлык азыктарын “бисмилла” менен баштап жешти. Таң атаарда Жаратканга жалбарып дуа кылышты. Күндүз болсо, Алланын ыраазычылыгы үчүн, ар кандай кыйынчылыктарга чыдап, ачка, суусап жүргөнгө сабыр кылышты. Алар денелерин да, рухтарын да машыктырды. Башкача айтканда курсактарын да, тили менен көңүлүн да толук башкарууменен отуз күндүк орозолорун ыклас менен бүтүрдү. Кулдуктун сыноосунан ийгиликтүү өтүштү.

Айт күндөрү боордоштук сезимдер күчөп, жылмаюу мээримине толгон күн болуп саналат. Бул күнү таарынычтар жазылат, достуктар чыңалып, колу-коңшулар бири-бирин жоктоп зияратташат. Ата-энелер сый-урматка бөлөнүп, ойлогон ой-максаттары, каалоолору орундалат.

Айылдагы кадыр барктуу улуулар, араздашкандарды кайра жараштыруу аракетин көрүшөт. Бул күнү кичинекей балдар да татына кийинишип, майрамдын көркүн ачышат. Жетимдер, кедейлер, кароосуз калган балдар, сөзсүз абалы суралып, кубаныч-шаттыкка бөлөнүшөт. Бир жетимдин бутуна кирген кичинекей тикенек алынса, Алла Таала ошол тикенектин себебинен, миңдеген жакшылык гүлдөрүн өндүрөөрүн жана ал иш кабырдагы жашоодо бакыт-таалайга жеткирээрин айткан.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!