Убактылуу кармоочу жай курорт эмес! ИИМ Атахановго жооп кайтарды

Убактылуу кармоочу жай курорт эмес! ИИМ Атахановго жооп кайтарды
22-Май 2019, Шаршемби, 17:53

Кыйноонун алдын алуу боюнча улуттук борбордун өкүлдөрү крим төбөл Азиз Батукаевдин абактан мыйзамсыз бошотулушу боюнча камакка алынган Шамиль Атахановдун абалы менен таанышкан эле.

Анда Атаханов кармоодо медициналык күбөлөндүрмөдөн өткөрүшпөй эле убактылуу кармоочу жайга киргизилгенин кабарлаган. Ал ошондой эле камерада төшөнчү жок экендигин айтып, прокуратурага арыз жазган.
Ал эми Ички иштер министрлиги Шамиль Атахановдун айткандарына жооп кайтарып, айтылган дооматтарды четке кагууда.

“Тилекке каршы, убактылуу кармоочу жай курорт эмес. Убактылуу кармоочу жайга алып келгенде жана камерага киргизүүдөн мурда кармалуучунун денесинде ар кандай жаракаттардын жоктугу текшерилет, андан сырткары нөөмөт кызматкери тарабынан ден соолугунун абалы суралат. Ден соолуктун начарлап кетиши же оору белгилерин байкаган учурда кызматкер тез арада тез жардам кызматын чакырат. Ошондой эле жактоочусу менен жолугушуу жөнүндө талабын аткарбай коюшкан деген билдирүүсү чындыкка дал келбейт. Кармалуучу киргизилген камерада матрац жана эки одеял бар болгон, бүгүн болсо дагы бир одеял берилди. Даары-дармектерди жана жеке буюмдарды жумуш күнү саат 09:00дон 19:00го чейин берүүгө болот”, – деп билдирди ИИМ.

Азиз Батукаевди мыйзамсыз бошотуу боюнча кылмыш ишин иликтөөнүн алкагында 21-май күнү, экс вице-премьер-министр Шамиль Атаханов камакка алынды. Алгач ал ИИМге сурак берген соң Жазык-процесстик кодексинин 98-беренесине ылайык кармалган.

Крим төбөл Азиз Батукаевдин абактан мыйзамсыз бошотулушу боюнча мурдагы Саламаттыкты сактоо министри Динара Сагынбаева жана Жаза аткаруу мамлекеттик кызматынын башчысынын мурдагы кеңешчиси Калыбек Качкыналиев камакка алынган эле.

Эскертүү: Сайтыбыздагы маалыматтарды колдоноордо, биздин сайтка ссылка көрсөтүүнү унутпаңыздар!